JEAN LOUIS BUTHERLY ( Boomba Libertaire) REVOLISYON Se konba nou pou nou libere Ayiti Medsen kilti ayisyèn nan .

 

JEAN LOUIS BUTHERLY ( Boomba Libertaire)

REVOLISYON

Se konba nou pou nou libere Ayiti

Medsen kilti ayisyèn nan .

Pwojè Sosyete Pou Ayiti  

   Mouveman Boomba Ayiti (MBH) / Ayi-yon bagay ki depase nou. Ti- tout bagay posib .

 

Nan moman kriz sila ,mwen pote pou nou yon pwojè Sosyete kap ede tout responsab peyi a pou yo ka pran bon desizyon pou chanje eskanp figi Ayiti.

Pwojè Sosyete  

« Yon Ayiti ki pwoteje epi kap  libere enèji « 

Pwojè pou Ayiti , solisyon pou peyi a chanje nan yon ti kras tan ankò.

Yon pwojè kap reponn ak tout egzijans Popilasyon an .

Nap kòmanse, pou nou di LEta se yon espas ki delimite , li se yon kolèktivite sa vle di, yon gwoup moun ki etabli sa vle di  ankò tout moun dwe viv ansanm ,li gen yon pakèt règ  òganizasyon ak enstitisyon ki fòmè yon ansanm men yo pa toujou mache nan yon chemen ki dwat , ni yon liy ki dwat tou.

 Vizaj LEta sa yo  prezante tankou yon kouto debò  .Si gen yon litij nan zafè lEta ak tout sa ki bon pap janm ka mache byen se sak fè n ap pwopoze , kèk terapi ak kèk koreksyon pou nou wè si nou kapab refè lEta peyi nou an .Si nou kapab refè vizaj jenès la pou yo tout  genyen yon vizyon ki sanble ak kèk  aspirasyon inivèsèl.

1-Sa nap pwopoze ,se pou Ayiti soti nan baraj lengistik sa a, ki enpeche peyi a mache byen nan tèm akademik .Se pou tout lekòl yo anseye tout elèv yo nan lang matènèl yo ( yon lang matènèl se yon lang  anviwònman , lang fanmiy ou yon lang ou pa bezwen al lekòl pou w pale lang sa ) epi se pou tout sa kap fèt nan peyi a fèt nan lang Kreyòl la , pou sa fèt se pou tout enstans ki konsène yo ( A.K.A , kise Akademi Kreyòl Ayisyen , kòmanse fè tradiksyon anpil liv men pou sa fèt fòk genyen yon konsyans pataje  se pou gen anpil lajan ki depanse , men moun ki pral bay lajan pou fè sa pa genyen anyen yo pral defann ak  lang Kreyòl la , paske yap toujou bezwen lang kolon yo pou yo toujou kenbe konsyans pèp la.

2- Anseye lang Kreyòl la nan tout peyi a , sa vle di nan tout komin yo , montre yo kòman pou yo defann lang la , kòman pou yo fè pwomosyon pou lang la .Lang Kreyòl la dwe yon priyorite Politik pou nou paske sa ap fè nou tout ansanm tounen nan rasin nou tankou yon pwovèb popilè renmen dil « inyore lang pèp la se tankou ,bliye kilti pèp la , se tankou pa konsidere w Kòm pèp »

3- Se pou chak Ayisyen renmen Ayiti  , se pou nou tout mete tèt nou ansanm pou nou chanje peyi a, e si nou fè sa pap gen nasyon kap kapab kanpe anfas nou paske nan linyon tout pwogrè fèt si nou te ini nou pou nou fè 1804 nou ka toujou refèl ankò.

4- Mete sou pye yon rejim prezidansyèl sa vle di vini avèk yon vis-Prezidan epi  retire zafè premye minis la.

5-Mete sou pye  yon paleman monokameral sa vle di , retire Sena a ranplasel pa yon chanb konsiltativ sa vle di yon kote (tout  kouch sosyal yo reyini )nouvo tankou ansyen yo ap chita pou pwopoze lòt altènativ pou peyi a.

6- Mete sou pye yon veritab Eta dwa nan peyi a sa vle di ,revizite estati  majistra yo ak tout pèsonèl jidisyè yo. Se pou moun ki responsab jistis yo vinn pi moun, se pou yo vinn pi serye nan desizyon yo  , se pou genyen yon karaktè moun nan jistis ayisyèn nan ,  se pou nou pwoteje anviwònman kote prizonye yo ye yo Paske yap viv kote Chen pap rete . Pwoteje laprès peyi a nou bouke wè jounalis kap mouri pou pozisyon politik yo , nou bouke tande lanmò entèl ak entèl .Pwoteje tout bon asosiyasyon kap defann dwa moun nan peyi a.

7- Fè moun yo gen konsyans nan eleksyon lib epi demokratik .Se pou nou fè Pèp la gen konfyans nan eleksyon kap fèt nan peyi a , eleksyon dwe fèt lib tout moun dwe al vote se yon devwa sitwayen , se pou bilten yo inik , epi manda Prezidan an dwe renouvle kantite fwa si lap byen travay.

Dezyèm pwen  

Yon Politik ki gen fòs, pou nou envèsti nan rekonstriksyon peyi a.

1-Ak lajan ki nan bwat lEta yo nou dwe dispoze 500 MW elektrisite chak lane , kontra sa ap finanse ak anpil patenè piblik _ piblik ( P-P)  ak piblik- privè.(P-P)

2- Konstwi  plis santral elektrik nan peyi a, sa vle di mete anplas anpil dizèn mega oubyen ti santral elektrik pou tout moun gen enèji lakay yo sa ap pèmèt LEta achete eneji sa yo nan yon pri abòdab pou tout Popilasyon an ka jwenn . Konsa anpil moun ap rale souf , Paske koze enèji a fè anpil dega nan peyi a , li koze anpil lanmò . Men peyi a pa ka rete konsa si Ayiti vinn peyi ki pi pòv nan monn nan  se rèsponsab politik nou yo ki lakoz.

3-Nou dwe envèsti nan enèji vèt , se sak fè solèy la ap enpòtan pou nou paske gen zòn ki pap ka jwenn enèji nasyonal la , Fòk nou konprann sa men  nap priyorize santral pano solèy pou yo Paske yo tout moun se moun si bon dlo ap kouri anwo , li dwe koule byen pou sa ki anba tou.

4- Nou ka pwodui 500.000m3 dlo chak lane ,nap kòmanse mete yon mega estasyon dlo nan chak rejyon , yon mini santral nan chak depatman ,epi yon ti santral nan chak arondisman yo .Pou tout bagay sa yo posib nap bezwen 100 milya goud sèlman rès kap rete nap remèt yo nan kès lEta paske lajan leta se pou leta.

5- Nou kapab fè 1000 km wout chak lane paske nou ka di gen anviwon 1000 km pou moman an ,objektif la se mete nan chak komin yo an woutye  nasyonal sa vle di relye tout wout yo ansanm sa ap pèmèt pwodiksyon agrikòl la mache  , (nou ka fè plis manje paske ap gen bon wout trafik machandiz yo ap fèt pi byen)  nap soti tou nan sistèm akayik sa nou ye la nan antikite tadiv .Fè gwo esplwa  sa ap pèmèt entistriyèl yo byen fonksyone tou.

6-Nou ka konstwi yon  izin kap kraze ròch nan chak depatman nan peyi a.

7-Amenaje zòn andeyo yo,nou ka rezève 250 km wout nan 1000 km nou gen chak lane a paske repiblik la pa pou pèsòn li se pou nou tout , nou tout gen menm dwa .Nenpòt kote ou ye depi ou vini sou sòl la ou lib se nan optik sa tout moun ap jwi menm privilèj leta bay.

8- Nou kapab konstwi yon chemin fè , sa ap byen senp mwen pral esplike nou,nou ka konstwi chemin fè a nan yon mezi ki pral 3500 km ( 1750 km X 2 ) sa vle di lap fèt an 2  epi lap laj nan yon mezi ki pral ( 1.30 m) ant Okap ak Pòtoprens epi 480 km ( 240 X 2 vwa soti wanament pou rive Okap . Konsa nap sou wout devlopman tout gran peyi genyen yo poukisa nou menm nou pa ka genyen yo , nou se yon gran peyi ki te konn okipe anpil lòt peyi nan monn nan , nou ede anpil nan yo pran endepandans yo tou. 

9 - Nou kapab konstwi gwo batiman agwo-endistriyèl pou nou konsève pwodiksyon nasyonal  yo , yon pati nan bidjè leta a ap finanse enfrastrikti sa yo epi sèktè prive ak lòt moun ki nan dyaspora Ayisyèn nan ap mobilize tou.

10-Nou kapab konstwi epi rekonstwi kèk batiman piblik tankou ( lekòl , lopital, agrikòl elatriye)

Yon kouvèti swen lasante pou tout moun nan peyi a. 

1-Tout Ayisyen dwe gen kat asirans maladi epi kreye yon kès asirans maladi .Fòk gen lwa ki di  kat asirans maladi dwe obligatwa nan peyi  a epi tout  moun kap frekante espas piblik yo dwe gen yon kat asirans.

2- Nou kapab kreye yon anviwònman ki bon pou tout moun jwenn swen lasante nap bezwen 400 milya sèlman nan bidjè a pou nou bay Ayiti yon kòd sante piblik epi ap gen yon lwa sou biyoetik .Nou kapab rekrite 500 enfimyè ak paramediko pandan 5 lane  epi fòme 300 medsen espesyalis nan peyi a oubyen nan lòt peyi etranje .

Nap bezwen 30 Ki gen espesyalite diferan tankou nan nerochiriji , grèf ògann chiriji plastik , reparatris , chiriji kadyak , chiriji konvansyonèl , jenetik , kansewoloji elatriye) 

3- Rewòganize epi restriktiye sistem sante nou an.

Nou kapab siyen yon konvansyon kap pèmèt tout pèsonèl nan sante yo travay ansanm piblik tankou prive se pou nou kreye otorite pou medsin tradisyonèl la tou ,se pou nou reyòganize epi ranfòse Pouvwa médikal nasyonal  nan peyi a ( medsin tradisyonèl , medsin veterinè elatriye)

4-Nou kapab amelyore enfrastrikti sanitè nan peyi a.

Nou kapab kreye plis pase 10 inite pou pran swen moun ki pi nan bezwen yo tankou ( AVC, maladi kè elatriye) 

Kreye 10 lopital referans nan peyi a yap kofinanse epi yap jere pa leta ak lòt aktè nan sektè prive a.

5- Ankadre medsin tradisyonèl la , se pou genyen jaden botanik , se pou gen etid ki avanse ak tout fèy nou gen la yo pou nou trete kèk maladi plas leta nan bagay sa se jis regile  .

Lajan moun ap touche , Retrèt , Refòm , Sektè  prive ak sektè piblik

Nou vle pwopoze Yon sèvis Piblik ki gen bon jan kalite

1- Amelyore ankadreman Popilasyon an jis pou nou ka fasilite emèjans tout ajan piblik  yo .

2-Reyekilibre bidjè nasyonal la , sa vle di si bidjè a 5500 milya goud nap pran 45  %  pou envèstisman nap pran 40  $ %  pou fonksyònman epi 15  %   pou sèvis epi dèt peyi a.

3- priyorize envèstisman nan peyi a , pou nou fè sa nap pran 2400 milya de goud nan bidjè a nap repatil konsa .

Nap pran 500 milya nap metel nan agwo-endistri ak devlopman zòn andeyò yo.

Nap pran 450 milya pou endistri epi nap pran 1000 milya pou enfrastrikti ( wout , ray elektrisite, dlo , batiman , elatriye)  epi nap pran 450 milya goud pou zafè Politik sosyal.

4- Se pou Popilasyon an peye taks , enpò pou nou ka jwenn 20 %  nan PIB nou an sa vle di 400 milya resèt pwòp.

5- Mete plis bon jan kad nan sektè edikatif nou an.

Nou vle rekrite 22 .000 ansèyan chak lane sa vle di nap pran 10 000 enstititè  ak 11 000 pwofesè lise epi 1000 ansèyan nan inivèsite chak lane.

6- Fè sistèm sante nou an redoutab ,pou nou fè sa nap bezwen 8000 pèsonèl sante kap gen 2000 medsen epi 250 nan chak fakilte leta.

7- Ranfòse sekirite nasyonal peyi a 

pou nou fè sa nap bezwen 5000 pèsonèl sekirite kap gen ( polisye , janda m, eko-gad , militè )

8- Rapwoche jistis peyi a ak sitwayen yo.

Sa vle di nap bezwen 5000 pèsonèl jistis ak lòt ajan ki nan administrasyon peyi a pou nou wè si nou  ka mete tout gwoup nan Sosyete a ansanm.

9- Fè Administrasyon piblik yo modèn fè tout dokiman ki nan administrasyon yo nimerik se pou tout moun gen tout enfòmasyon yo menm jan ak tout moun ki anlè yo , pwopaje enfòmasyon yo apre pèsonèl konsène yo finn fè trètman .

Fòk peyi a gen yon lòt modèl  ekonomik 

Yon ekonomi kwasan kap baze sou agrikilti , endistri ak sèvis piti antrepriz , mwayèn antrepriz epi gran antrepriz.

Politik ekonomik yon peyi dwe baze sou 2 gran baz 

agwo-endistri ak konstriksyon 

Pwodiksyon yon peyi dwe gen bonjan enfrastrikti .Pou yon peyi devlope li dwe mache ak sivilizasyon an , konstriksyon  sivilizasyon ayisyèn dwe sèl preyokipasyon nou.

1-kreye yon agwo-endistri nan chak awondisman peyi a.

Se pou leta konsève 20  %  nan bidjè a pou agrikilti sa vle di 500 milya goud pou  semans , elektrisite , batiman agrikòl , abatwa elatriye)

2- kreye yon izin nan chak komin pou nou transfòme matyè premye yo .

Sa ap pèmèt nou fè endistriyalizasyon nasyonal la epi evite twòp moun vinn gonfle nan gran vil yo.

3- Akonpanye kreyasyon antrepriz nan peyi a.

Kreye antrepriz sèvis tankou labank, mikwo kredi, asirans , transpò anwo dlo  touris Otèl komès ,elatriye.

4- Priyorite pou antrepriz nasyonal yo 

Nou vle sa paske , livrezon ap ka fèt sou kòmand pi byen nan chak komin , nan chak depatman peyi a.

5- Nou vle finanse ti antrepriz yo epi devlope ekonomi nimerik nan peyi a  paske nou vle  10.000 moun jwenn travay chak lane epi mete anpil dispozitif pou yo genyen 10 %  jiska 20 %  epi devlope komès nan peyi a.

6-Kapitalize banque PME yo epi fè nou genyen yon ekonomi sosyal epi solidè.

LEta dwe dispoze 200 milya goud nan bank yo pou fasilite jèn antreprenè lokal ak nasyonal yo trouve prete. Ankouraje ti antrepriz yo epi mete antreprenè Ayisyen yo nan yon relasyon ki onèt ak antrepriz prive yo.

Yon sitwayen Ki gen sekirite pa pè anyen .

1- Nou vle kreye 50.000 kay chak lane  paske nou pa ka nan syèk  sa pou moun ap Domi deyò nan lari se pou leta pran responsabilite l  . Pou pwojè sa reyalize se pwomotè yo menm kap finansel.

2- Fòk nou rezoud tout problèm ki gen andeyò yo se sak fè nan chak zòn pral gen pòs polis pou tout moun santi yo nan sekirite .Polisye sa yo ap touche pa yon komisyon ki la pou jere dezòd kap fèt.

3-Se pou moun ki andikape yo jwenn plas yo nan peyi a se pou yo jwenn travay valorize menm jan ak tout moun , se pou yo patisipe nan konkou piblik tankou prive e sa fòl obligatwa fwa sa pap gen diskriminasyon.

4-Fasilite kote ki pwòp pou pèp la rete , se pou gen kontra lokasyon livre 100 menswalite konsa pou moun nan pwopriyetè kay la fòl ta fè 9 lane ladanl.

5- Tout moun ki gen laj retrèt dwe pranl paske gen anpil jènn ki fòme nan peyi a ki poko ka travay , tout pèsonèl sivil ki nan peyi a depiw gen 60 lane ou pap travay ankò leta la pou pran swenw vinn manje saw te fè.

6- Konbat tout delenkens ki gen nan peyi a , tout sa ki pa nan lòd tout moun ki pa rèspèkte lalwa dwe pini e pinisyon yo dwe grav pou lòt moun kap gade pa fè sa tou. Mo Ayiti à soti nan yon gran sivilizasyon sa vle vle di Ayiti dwe yon peyi lalwa se pou gen yon veritab eta dwa nan peyi    Paske nan moman an la peyi fè fas ak sa nou rele inefikasite leta dwa nan peyi a 

Ayiti dwe genyen yon diplomasi ki modèn epi ki bay rezilta.

Diplomasi ayisyèn nan dwe vizib sou tout plan rejyonal , kontinantal ak nan monn nan 

, pou sa fèt se pou LEta a mete moun ki kalifye nan pòs estratejik epi chèf peyi dwe patisipe nan gran rankont pou pèmèt peyi a gen plis relasyon sou plan entènasyonal.

1- Ankouraje koperasyon inivèsite 

2-devlope yon agrikiltiki ki komin 

3-Fòk gen koperasyon militè 

4- Devlope rechèch inivèsite nan peyi a

5-Soti peyi de tout dèt li genyen

6-Nou dwe invèse koub nagativ yo enstore nan peyi a Fòk nou bay jarèt a pwodiksyon nasyonal pou nou evite prezans dominikan , amerikan sou mache nou an.

Yon Sistèm edikatif Ki gen misyon inovasyon 

Sa pa etone okenn moun pou nou di edikasyon se mòte devlopman tout Sosyete men kòman sa dwe fèt ?  sistèm edikatif nou an baze sou yon ansyen sistèm kolonyal , Se sak fè tout kontni ki genyen nan sistèm nan se kopi sa vle di anyen pa sanble nou vre , sa sak fè nou dwe reyoryente sistèm nan jis pou nou ka genyen yon sistèm edikatif ki baze sou reyalite peyi a epi ki gen yon misyon pou mas pèp la. Kòman ou vle m fè wè chanjeman Sim toujou chita nan kwen ?  Se kesyon sa ki Pouse mwen ekri sou sistem edikatif ayisyen an plizye tèks disponib nou kapab konsilte yo gratis 

1- Nou vle devlope yon bilengwis  ki global sa vle di sou plan ni sosyal ni entelèktyèl de lang yo nan menm nivo fwa sa nap fini ak diglosi  nan peyi a nou pral devlope milti lang sa vle di toutan nou ka fè plis moun pale plis lang nap pi kontan.

2- Konstwi yon 2 lise nan chak komin peyi a ki ka resevwa 4000 elèv , kap genyen tout ekipman modèn yo , Bibliyotèk , Laboratwa, tèren , Kantin eskolè , elatriye )

3-Miltipliye plis inivèsite leta nan peyi a kap gen anpil filyè tankou ( medsin, jeni endistriyèl , agwonomi, lekòl komès ,bon Lekòl syans Politik , epi devlope rechèch nan medsin tradisyonèl la , epi pran 1000 pwofesè chak lane pou nou avanse nan domèn syantifik yo , pèmèt etidyan ki finn fè lisans yo jwenn Bous etid pou al fè mastè ak doktora apresa pou yo vinn tounen sèvi peyi a. Se pou nou finanse tout etidyan ki pral fè doktora , ba yo 200.000 goud pa mwa .

4- Nou vle plis moun ki enstwi nan peyi a , lè sa ap gen mwens delenkens , toutotan nou pa enstri nou pap janm gen demokrasi nan peyi a , Paske demokrasi mache ak enstriksyon, se pou tout Ayisyen patriyòt se pou nou tout goumen pou menm kòz, tout sa se lekòl la pouki ban nou l ...se sistèm edikatif la sèlman ki ka chanje Sosyete a. 

Ayisyen Chwazi avni nou 

Panse yon Ayiti bon se panse yon sèvis piblik ki bon ,se nan optik sa fòk nou mete moun ki konpetan moun ki renmen peyi a bon nasyonalis ,moun ki vle fè peyi , moun ki vle bati peyi.

Gen yon ekonomi ki kwasan dwe baze sou 2 pilye  :  Agwo-endistri ak konstriksyon, dwe gen posibilite pou chak komin gen yon agwo- endistri.

Se pou peyi a gen yon Politik ki planifye , ki òganize,Se pou peyi a gen plis pase 2000 km wout byen fèt epi devlope yon vwa chemen fè kap genyen 3500 km,  tout sa yo  ap pèmèt nou gen yon Bèl peyi epi gen yon avni ki pwòch epi rezone pou tout moun.Se pou nou sispann ak jan de politik akayik sa nap viv la , se pou aktè politik ansyen vye rat yo kite plas pou jèn aktè yo .Nou vle Sèlman de pati politik nan peyi konsa nap kapab planifye tout aksyon politik nou yo .

Se pou nou tout jwenn , swen lasante nan peyi a. 

Se pou pèp Ayisyen an devlope yon lòt kontra Sosyal , sa vle di  se nou menm ki dwe preyokipasyon nou menm ,aprè tout sa ki ap pase la yo se pou nou fè Politik nou an yon lòt jan.

Se pou nou menm Pèp Ayisyen , chanje sistèm Politik sa nou genyen la a , chanje pratik Politik sila , mete tèt nou ansanm nan linyon nou ka fè anpil bagay , pa kite pèsòn vinn divize nou , nou se yon pèp ki fò , ki te defann yon vizyon ki inik .

Jenès la se pou batay la kontinye , pa kite yo achete nou , nan nenpòt sikonstans se pou nou mete tèt nou ansanm pou nou libere enèji ki nan nou .

Kimoun ki ekri pwojè Sosyete sa se( Jean Louis Butherly ) Alyas Boomba Libertaire kap etidye syans moun ....pou plis enfo + 509 39989718 

Annou reflechi ansanm .Annou reflechi Repiblik la .Annou reflechi sistèm sa nou ladan l lan.

Mwen pou yon Ayiti kap pwoteje epi kap libere enèji 

Ansanm annou tounen paj la .

Gen kèk pyen kap vini , ki pral pale de Espò , kilti ak travay. 

+509 39 98 97 18

Stillboomba282@gmail .com

Ma chaine Youtube :  ekri still Boomba

Kongrè etidyan nò.

Mon blog https://stillboomba.blogspot.com/2021/09/role-des-jeunes-dans-la-promotion-dun.html ( plus de 800 textes disponibles actifs depuis 2019 )